Тываның Виктор Көк-оол аттыг Национал хөгжүм-шии театрының чанында тиккен чеди ханалыг ак өгнүң чоок кавыда кожалары болуп, 11 дугаар школаның 5-ки клазының өөреникчилери аалдап келгеш, аяк-шайны аартап ижип ора “Ак-Сагыш биле Кара-Сагыш” деп алышкылар дугайында тоолду магадап дыңнааннар.
Келген аалчыларынга баштай өгнүң ээлери аякты аалчыларга канчаар сунарының дугайында болгаш өгнүң тургузуунуң дугайында кожаларының ажы-төлүнге тайылбырлап чугаалааннар. А тоолчу тоолун эгелээрде баштай тывызыктарын салган, өөреникчилер тывызыктарны дыка сонуургап тыпканнар.
Дараазында база тоолдарны ыдар бис, чарлалдарны көрүп тургаш, кассадан билетти садып алгаш кээп дыңнап болурун театр дыңнадып турар.
Тываның национал театрында «Тоол театры» деп солун төлевилел боттанып эгелээнин сагындыраал.
