Сактыышкынның болгаш кажыыдалдың хүнүнге тураскааткан хемчеглерни 1996 чылдан тура бүгү Россияда демдеглеп эрттирип турар.
Бии-Хем кожууннуң Аржаан сумузунуң чурттакчылары Ада-чурттуң Улуг дайынының маадырларының тураскаалының баарынга амы-тынындан чарылган дайынчыларны сактып, кажыыдалдың минутазын чарлап, чечектер салыр езулалга киришкен. Аныяктар болгаш школачылар сактыышкынның чулазын кывыскан.
Дайын чылдарының үезинде республиканың чону Совет Эвилелинге бүгү талазы-биле дузазын көргүскен. Кызыл шериглерниң одуруунга Тыва Арат Республикадан муң-муң совет хамаатылар, оларның иштинде тыва эки турачылар сеткилиниң кыйгызы-биле дайылдажып турган.
1941 чылдың июнь 22-де, дайын эгелээн хүнде, Тыва Арат Республиканың X Улуг Хуралының ээлчеглиг съездизинге делегаттар фашистиг Германияга дайынны чарлаар дугайында шиитпирни үндүрген баштайгы даштыкы күрүне болган.
#Сактыышкынныңболгашкажыыдалдыңхүнү #Бии_хемкожуун #Аржаан #ТМГМедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews
