Каа-Хем кожууннуң Бүрен-Хем ортумак школазында тускай шериг операциязынга дайынчы албан-хүлээлгезин күүседип тургаш, амы-тынындан эрес-дидими-биле чарылган дайынчы, биче сержант Эдуард Билзенниң чырык адынга тураскааттынган «Маадырның партазын» ажыткан.
Маадырлыы-биле амы-тынындан чарылган биче сержант Эдуард Билзенниң чырык адын мөңгежидери-биле тураскаал самбыраны Кызылда 55-ки тускай мото-адыгжы (даг) бригадазының командириниң хүлээлгезин күүседип турар майор Азат Радутович биле кожууннуң чагырга даргазы Евгений Ооржак ажыткан. Ында Маадырның чуруун болгаш допчу-намдарын киир бижээн. Ол ышкаш Бүрен-Хем сумузунда чаа туттунуп турар кудумчуну Эдуард Билзенниң ады-биле адаан.
Каа-Хем кожууннуң чагырга даргазы Евгений Ооржак Эдуард Билзенниң ада-иезинге Өөрүп четтириишкин бижиин тывыскан.
Дайынчыларның дугайында чырык сактыышкын Тываның чурттакчыларының чүрээнге артар. Эрес-дидим, коргуш чок, даңгыраанга болгаш албан-хүлээлгезинге шынчызын көргүзүп, тайбың дээш амы-тынын өргээн Маадырлар уттундурбас.
