Эрзин кожууннуң В. Эренчин аттыг төп ном саңынга Улуг-Хем кожууннуң херээжен чон ортузунга ажыл чорудар чөвүлелиниң кежигүннери тыва сыртык болгаш тыва тон даараар мастер-класстарны көргүскенин ном саңы дыңнаткан.
Эрзинниң херээженнер чөвүлелиниң чалалгазы-биле Улуг-Хем кожуундан иштежилери аалдап келген. Арыскан сумузунуң чагырга чериниң даргазы Шончалай Донгак, херээженнер чөвүлелдиң даргазы Айлаңмаа Байыр, ниити билиг ортумак школазының музей удуртукчузу Чечеймаа Кыргыс оларның эрттирген национал хеп, эт-сеп даараар мастер-класстарынга тус черниң херээжен чону киржир база арга-дуржулга солчур аргалыг болган.
Төп ном саңының ажылдакчылары "Чаңчылывыс утпаал, сагыызын дег камнаал" деп ном делгелгезин кылган. Аалчылар Эрзинниң ниити билиг школазының музей удуртукчузу Чодураа Күжүгет-биле ужуражып, музейни база сонуургап көргеннер.
