Таңдыда «Эзирлерниң уязы» төлевилел-биле үшкү спорт залы ажыттынган.
Бо удаада Кызыл-Арыг сумузунда хүреш залы эжиктерин келир үениң мөгелеринге ажыткан. Таңды кожууннуң чагырга даргазы Алик Монгуш ук объектиниң тудуунга үлүг-хуузун киирген кызыл-арыгжыларны демдеглеп, өөрүп четтириишкин бижиктерин тывыскан.
Байырлыг хемчег үезинде чаа оран-саваның “ээлеринге” хүреш маргылдаазын база эрттирген. Алик Монгуш Кызыл-Арыгның спорт өргээзинден “Хартыга”, “Арзылаң”, “Чаан” болгаш “Күчүтен” мөге эзирлер ужуп, девип үнерин күзээн.
Сес ханалыг өг ышкаш кылдыр туткан спорт залындан тыва болгаш өске-даа хүрештерниң эрес-кашпагай мөгелери шүүргедеп үнери чугаажок.
