Каа-Хем кожууннуң Копту-Аксы сумузунда “Сорунза” төлевилели-биле көдээ культура бажыңының тудуу уламчылап турарын чагырга чери дыңнаткан.
Тудуг объектизинде суму чагырга чериниң, кожууннуң культура эргелелиниң, культура одагларының ажылдакчылары хүннүң-не ажылдап турар.
Ол ышкаш суму школазының база уруглар садының коллективтери идепкейлиг киржип турарлар.
Культура бажыңының серизин кыска үе дургузунда кылып дооскан. Каңнаар болгаш иштики шеверлел ажылдары шалыпкып чоруп турар, чаа эт-септи киирген.
“Сорунза” төлевилелиниң кол сорулгаларының бирээзи – амгы үениң негелделеринге дүүштүр культура бажыңнарын суурларга тудары.
Копту-аксыжылар чонну хаара тудар сорунзалыг культура бажыңын ажыглалче киирерин четтикпейн манап турар.
