Кызыл хоорайның 9 дугаар гимназиязының ада-иелери чайгы дыштанылга үезинде «ада-ие хайгааралын» Улуг-Хемниң эриин дургаар чорудуп турарын республиканың немелде өөредилге сайзырадыр төвү дыңнаткан.
Хүннүң-не класстар аайы-биле ада-иелер хем эриинге хыналданы чорудуп, хайгаарал чок эштип турар уругларга сагындырыгларны кылбышаан, бажыңнарынче чандырып турар.
Ада-иелерниң дыңнадып турары-биле алырга, хем эриинде улуг улустуң хайгааралы чок назы четпээннер ийи-чаңгыс таваржып келир. Хөй кезиинде ада-иези-биле азы шуут таварышпайн баргылаар.
«Бистиң хыналда кылып турган хүнүвүсте Улуг-Хемниң эриинге ындыг-ла хөй чон чок болган. Бир оол ачазы-биле агаарлап чораан. Маргылдаага белеткел соонда хем эриинге дыштанып олурган оолдарга айыыл чок чоруктуң дүрүмнерин сагындыргаш, чандырган бис» – деп, Кызыл хоорайның 4 «г» клазының ада-иелери чугаалаан.
«Хем эриинге улуг улустуң хайгааралы чок эштип турар уруглар бистиң хынаан хүнүвүсте чок болду. Хыналданы хүндүскүнүң 12 шактан эгелээн бис. Чүгле хем эрии эвес, а «Өг-бүле сесерлиинге» база четтивис. Шупту назы четпээн уруглар ада-иези-биле дыштанып хүнзээн. 9 дугаар гимназияда өөренип турар уругларывыстың чайгы дыштанылга үезинде айыыл чок чоруу дээш хыналдаларны организастап турар класс башкыларынга улуу-биле четтиргенивисти илередир-дир бис» – деп, 3 «г», 4 «г» класстарның ада-иелери демдеглээн.
