Тываның көдээ ажыл-агый сайыды Сергей Ондар Туран хоорайның Найырал арбанының чурттакчылары-биле ужурашкан.
Тываның Баштыңы Владислав Ховалыгның даалгазы езугаар Найырал арбанының девискээринге сүт-бараан фермазын катап тургузарының айтырыгларының талазы-биле чоннуң чыыжы болуп эрткен.
Бии-Хем кожууннуң чагырга чери ферманы катап тургузарының төлевилелин ажылдап кылган. Чоокку үеде Тываның Баштыңынче таныштырары-биле киирер. Ооң бетинде сайыт найыралчыларга сорулгалар болгаш планнарны таныштырып, оларның санал-оналдарын, күзээшкиннерин билип алыр дээш албан-биле ужуражып келгени ол.
«Найыралчылар көдээ ажыл-агый адырында мурнакчыларның санынче кирип, чылдың-на Наадым байырлалдарында чедиишкиннери дээш шаңнадып турганнар.
Арбанда сүт-бараан фермазын катап тургузар бүгү аргалар (арга-дуржулгалыг тускай мергежилдиглер, техника) бар. Чаңгыс чер-чурттугларымга бүзүрелим улуг» – деп, кожууннуң чагырга даргазының хүлээлгезин күүседип турар Владимир Байыроол соцчеткилерде бижээн.
