Өвүрнүң район суду тургустунганындан бээр 85 чылын спартакиада-биле демдеглеп эрттиргенин шүүгү чериниң парлалга албаны дыңнаткан.
Бай-Тайганың, Барыын-Хемчиктиң, Сүт-Хөлдүң, Чөөн-Хемчиктиң болгаш Мугур-Аксында доктаамал турар Өвүрнүң район судтарының командаларынче шииткекчилер, шүүгү база суд участоктарының коллективтери кирген.
Спартакиаданы суд даргазының хүлээлгезин күүседип турар Андрей Седен ажыдып, байыр чедирген. Шииткекчи Юлиана Банзай киржикчилерге тиилелгени күзээн.
Командалар хол бөмбүүнге, баскетболга, стол теннизинге, аргамчы тырттарынга маргылдашкан.
Изиг-изиг демиселдиң түңнелинде, бирги черни Чөөн-Хемчиктиң, ийиги черни Сүт-Хөлдүң, үшкү черни Барыын-Хемчиктиң район судтарының командалары чаалап алган.
«Эң эки халдакчы», «Эң эки ойнакчы», «Эң эки камгалакчы» дээш оон-даа өске шаңналдарга төлептиг болганнарны база демдеглээн.
Спартакиаданың шилчип чоруур кубогун Барыын-Хемчиктиң найыралдыг коллективинге дамчыткан.
Тиилекчилерге суй белектерни тывыскан.
Спортчу хемчег амыдыралдың кадык овур-хевирин суртаалдаарынга болгаш чаңгыс демни быжыглаарынга салдарлыг болган.
