Тоолайлыгның сарлыкчылары малдарын чарыштырарынга белен

Эртен, август 8-те, Мугур-Аксы сумузунга регионнар аразының сарлык болгаш сарлыкчылар байырлалы эгелээр.

Байырлалың эң солун кезээ – сарлык чарыжы. Мөңгүн-Тайга кожууннуң төвүнде экер-эрес сарлык мунукчулары чыглып, чарышка белеткенип турарын ТР-ниң Дээди Хуралының депутады Ульяна Монгуш дыңнаткан. Тоолайлыгның элээди сарлыкчылары малдарын чарыштырарынга белен.

Фестивальга Тываның көдээ ишчилеринден аңгыда, Бурятияның, Алтай Республиканың, Моолдуң Увс, Архангай баз Ховд аймактарының сарлыкчылары кээп киржир.

Байырлал хүннеринде (август 8-9) эртем-практиктиг конференция, сарлыкчылар өг-бүлелериниң чыскаалы, аът чарыжы, хүреш, баг адар база чадаг чарыш болуп эртер.

Мөңгүн-Тайганың төпчүткен ном саң системазының “Төрээн черим малы чараш” деп төлевилели Тываның Баштыңының хамааты ниитилелди хөгжүдер грант акша-хөреңгизи-биле боттанып турарын сагындыраал.