Тываның чурттакчыларының болгаш аалчыларының ынак национал маргылдаалары – аът чарыжы, ча адары, хүреш шупту болур. Национал байырлал кижи бүрүзүнге уттундурбас болзун дээш, өске-даа солун хемчеглерни белеткеп турар.
ТР-ниң Ветеринария албанының дыңнатканы-биле алырга, аът чарыжынга салыр малдарны “Хорриот” системазынга бүрүткедири албан. Сагындырып каар чүүл, Тыва Республиканың 2025 чылдың июнь 11-де үндүргени 285 дугаарлыг доктаалы езугаар “Хорриот” электроннуг системаже көдээ ажыл-агыйның мал-маган тудуп турар ишчилери мал-маганын киирип эгелээн. Шак ол системаже күрүнениң ветеринария албан черлери ээзиниң амы-хууда дилээ-биле малдарын халаска бүрүткеп берип турар.
Кол чүүл – “Хорриот” системазында бүрүткеткен малдарның ээлеринге малының кайда барганын билип алырынга, айыылдыг аарыгларга удур баш бурунгаар профилактика ажылын чорударынга болгаш бодунуң өнчүзүнүң бүрүн эргелиг ээзи дээрзин камгалап алырынга дузалыг болуп турар.
Тываның Баштыңы Владислав Ховалыг ооң мурнунда-ла, мал ажыл-агыйының мурнакчылары эки көргүзүглүг бүдүрүкчү чедиишкиннерин көргүзеринден аңгыда, үе-биле деңге базып, амгы үениң технологияларын ажыл-агыйынга ажыглаар ужурлуг деп чаңгыс эвес удаа демдеглеп турган.
Наадым – Тывада мал ажыл-агыйга хүндүткелди көргүзүп, көшкүн культура чаңчылдарын кадагалап арттырарын, салгалдан салгалче национал үнелиг чүүлдерни дамчыдып турарын илередип турар эң-не кол байырлалдарның бирээзи.
Республиканың болгаш чурттуң өске-даа булуңнарындан муң-муң киржикчилер болгаш аалчылар чылдың-на байырлалга кээп турар. Аалчыларның хөй кезии бо үеде Тываже аян-чорук кылып, национал байырлалдың хемчеглерин сонуургап көөрүн планнап турар.
