Тываның Баштыңы Владислав Ховалыг Улуг-Хем кожуунга ажылчын сургакчылаашкын үезинде Шагаан-Арыг хоорайның 1 дугаар школазынга четкен.
«Көдээ черлерниң комплекстиг хөгжүлдези» күрүне программазы-биле эрткен чылын объектиге улуг септелге ажылдарын чоруткан. Школаның инженер четкилерин, соңгаларын, эжиктерин, дээвиирин, шалаларын чаарткан. Бедик шынарлыг иштики шеверлел ажылдарын кылган.
«Школаның эрги оран-савазындан ис-даа артпаан. Амгы үениң негелделеринге бүрүн дүгжүп турар чаа өөредилге төвү ында туттунган» –деп, Тываның Баштыңы бижээн.
Регион удуртукчузу чаа эт-сеп болгаш дериг-херексел-биле чаартынган класстарны, өөредилге лабораторияларын, оолдар, уругларга мастерскаяларын, робототехника кабинеттерин онзалап демдеглээн. Ылаңгыя лабораторлуг комплекс-биле четчелээнин магадаан: ам аңаа янзы-бүрү газтар-биле шенелделерни безин айыыл чок чорудуп болур.
«Школаны чаа дериг-херекселдер-биле четчелээн соонда, өөредилгевиске аажок сонуургалдыг апарган бис. Чижээ, робототехника кичээлинде роботту чогааткаш, боду шимчеп чоруур кылдыр программаны бижээн бис» – деп, школаның бир өөреникчизи өөрүшкүзүн үлешкен.
«Көдээ черлерниң комплекстиг хөгжүлдези» күрүне программазы-биле Улуг-Хем кожуунда элээн каш социал объектилерни тудуп база эде чаарткан. Чижээ, Чодураа суурда 2025 чылда 176 өөреникчиге школаны туткан, бо чылын Шагаан-Арыгга универсалдыг спорт залының тудуу эгелээр, а 150 өөреникчилиг уругларның уран чүүл школазынга эде тудуушкун ажылдары уламчылап турар.
«Школадан ырак эвесте, база бир – 150 олуттуг уругларның уран чүүл школазының тудуу чоруп турар. Объектиде ажылдарның 60 хуузу доозулган. Тудуг организациязы бо чылдың төнчүзүнге чедир ону доозар дээш идепкейлиг ажылдап турар. Бистиң республиканың булуң бүрүзүнде уругларга бедик шынарлыг өөредилгезинге болгаш комплекстиг хөгжүлдезинге бүгү талалыг байдалдарны тургузар дээш ажылдап турар бис» – деп, республиканың Баштыңы MAX мессенджерде албан езузунуң каналынга дыңнаткан.
