Тываның Баштыңы Владислав Ховалыг Улуг-Хем кожуунга ажыл-агыйжы сургакчылаашкын үезинде, ол дургаар оруктуң шынарын болгаш айыыл чок чоруун хынап көрген.
Р-257 автооруктуң Оттук-Даш биле Ийи-Тал суурлар аразынга участогунга ол орук ара доктааган. Чүс-чүс чолаачылар хүннүң-не аргыжып турар хайымныг оруктарның бирээзи ол.
Тываның Баштыңы кезек-кезек болгаш даглар ындындан көзүлбейн баар оруктарлыг айыылдыг участокче кичээнгейни угландырган. Бо черлерге чаңгыс эвес удаа айыыл-халаптар болгулаан. Ынчангаш Владислав Ховалыг ол айтырыгны шиитпирлээрин чогуур албан черлеринге дарый дааскан.
«Ол «көзүлбес черлерни» таарыштырып, чолаачыларга айыыл чок чорукту хандырары-биле бир дугаарында орукту дескилеп, калбартыр» – деп, регионнуң удуртукчузу MAX мессенджерде бодунуң каналынга тайылбырлаан.
Бо участокка ажылды бо чылын эгелээш, дөрт-беш ай дургузунда кылырын Владислав Ховалыг дыңнаткан. «Ынчангаш түр када тургустунар таарымча чок байдалдарны билип көөрүн чолаачылардан дилеп тур мен» – деп, ол чонга дыңнаткан.
Регионнуң удуртукчузу Шагаан-Арыгның бодунда оруктарның байдалынче база кичээнгейни угландырган. Ол чорааш, тудуг объектилерин болгаш социал албан черлерин кезииринден аңгыда, Октябрьская кудумчузунда орукту база көрген. Оруктуң байдалы баксыраанындан, хүн келген тудум өзүп турар транспорт чүъгүн эрттирип шыдавас апарганын Владислав Ховалыг демдеглээн.
«Бо чылын ону септеп эгелээр бис: долгандыр халдыр орук белдиринден хоорай поликлиниказынга чедир участок кезээн калбартыр» – деп, Тываның Баштыңы дыңнаткан. Ол ышкаш чадаг кижилер кылаштаар, автомашиналар тургузар черлерни чаагайжыдар талазы-биле аңгы даалганы ол берген.
Тываның Баштыңы регионда орук септелгезиниң чорудуун боду хайгаарап, тудуг черлери-биле доктаамал ужуражып, олардан графикти шыңгыы сагып, ажылды шынарлыг кылырын негеп турар. А республиканы кезип чорааш, ажыл чоруп турар участоктарга доктаап, ажылдың канчаар болгаш кандыг чоруп турарын көөрү албан апарган.
«Айыыл чок болгаш таарымчалыг орук инфратургузуун тургузары дээрге чаңгыс чер чурттугларывыстың кадыкшылын болгаш амы-тынын камгалаарынче инвестиция-дыр» – деп, МАХ-ка Владислав Ховалыг демдеглээн.
