Улусчу фронт Тываның Чазааның деткимчези-биле Тиилелге хүнүнге уткуштур дузаламчы чыыр ажылды чорудуп турар.
Бөгүн тускай шериг операциязының киржикчилерин деткээн ачы-дуза чыылдазынга Сүт-Хөл, Өвүр, Улуг-Хем, Каа-Хем, Эрзин, Тес-Хем кожууннар, Россияның федералдыг суд приставтарының Тывада эргелели, Кызылдың “Идегел” эки турачылар отряды каттышкан.
Сүт-хөлчүлер тускай шериг операциязы эгелээнинден тура дайынчыларга доктаамал ачы-дузазын чедирип турар.
«Бөгүн бистиң кожууннуң мурнундан генераторлар, бензин-биле ажылдаар хирээлерни, ажылчын инструментилер, бичежек хууңнарны арбай далганы, ааржы, курут, чигир, хоюдарынга белен сүттүг шай-биле иштээн. Суг-Аксының «Бүзүрел» эки турачылар штавы, сумуларда херээженнер база хоочуннар чөвүлелдери, албан черлери дайынчыларга чажыртынып шыптынар четкилерни дамчыткан. Ол ышкаш 50 муң рубльди шилчидер бис» – деп, Сүт-Хөл кожууннуң чагырга даргазының социал-политика талазы-биле оралакчызы Диана Ондар дыңнаткан.
Россияның федералдыг суд приставтарының Тыва Республикада эргелелиниң удуртукчузунуң дузалакчызы Маргарита Шумакова коллективиниң мурнундан «Mavic 3» ужудукчу чок аппаратты дамчыткан. Ооң мурнунда кады ажылдап турган Эрес Оюннуң чагыын күүсеткени ол. Маргарита Шумакова тускай шериг операциязында киржип турар дайынчыларны деткиирин ам-даа уламчылаарын дыңнаткан.
Кызылдың “Идегел” эки турачылар отрядының удуртукчузу Надежда Шоннай-оолдуң чугаазы-биле алырга, олар 2022 чылдан тура 170 ажыг чажыртынып шыптынар четкини дужааган. Бо удаада 3х6 хемчээлдиг беш четкини эккелген.
Апрель 30-де дайынчы хөделиишкиннер девискээринче 40 тонна ачы-дуза чүъгүн чорудары планнатынган.
Тускай шериг операциязында киржип турар дайынчыларга ачы-дуза чыыр пункт дараазында адрестерде ажылдап турар: Кызыл хоорай, Чульдум кудумчузу, 40А, өрээл 20, 21. (Улусчу фронтунуң регионалдыг салбыры), Ленин кудумчузу, 5 (Тываның күрүне университединде «Кады бис» штавы). Харылзажыр телефону: +7 (39422) 2-10-50.
Чуруктарны Ада Тюлюш тырттырган
