Чеди-Хөл кожууннуң девискээринге уругларның айыыл чок чоруун хандырар сорулга-биле малчын аалдарда назы четпээннерниң даңзызын тургусканын республиканың немелде өөредилге сайзырадыр төвү дыңнаткан.
Ол ышкаш кожуунда назы четпээннер талазы-биле инспекторнуң киржилгези-биле, өөредилге адырының ажылдакчылары профилактиктиг хыналдаларны чорудуп турар.
Хыналда үнүүшкүннер үезинде айыыл чок чоруктуң техниказын сагыыр дугайында чугааны ада-иелер болгаш уруглар-биле чоруткан. Аңаа, бир дугаарында, аът мунары хамааржып турар.
«Чайгы үеде назы четпээн уруглар мототранспорт мунары шуут хоруглуг, ооң элээдилерге тургузуп болур айыылының дугайында утпаза чогуур. Оон аңгыда ниитизи-биле ада-иелер уруг-дарыының чайгы дыштанылгазын хайгаарап, оларның кадыкшылы, амы-тыны дээш харыысалгалыг болур ужурлуг» – деп, өөредилге эргелелиниң ажылдакчылары сагындырган.
