Тываның Баштыңы Владислав Ховалыг республиканың чурттакчыларынга болгаш албан черлеринге фронтуда чаңгыс чер чурттугларынга ачы-дуза чыылдазынга киирген үлүг-хуузу дээш четтиргенин илереткен.
Тываның Улусчу фронтузу Россияның чаа регионнарының чурттакчыларынга болгаш тускай шериг операциязында чаңгыс чер чурттугларынга ачы-дузаның база бир партиязын дүүн чыггаш чоруткан.
Владислав Ховалыг ооң даалгазы-биле чыылданы организастаан дугайында МАХ-та бодунуң каналынга дыңнаткан. «Луганск болгаш Донецк улус республикаларже, Запорожье, Херсон, Курск, Белгород областарже улуг үш чүък машиназы ниитизи-биле 45 тонна чүъктүг үнүпкен. Бүгү Тыва чүък чорударынга чаңгыс организм ышкаш ажылдаан. Дайынчыларже эң чугула чүүлдерни: техниктиг дериг-херекселдер, камгалал херекселдери, бажың-балгат техниказы, доктар билбес автомобильдерни дамчыткан бис» – деп, ол дыңнадыгда бижээн.
Тываның Баштыңы ачы-дуза акциязынга киришкен республиканың чурттакчыларынга четтиргенин илереткен. Фронт чоогунуң регионнарынга болгаш ында дайынчы даалгалар күүседип турар оолдарга дузалажыры кижиниң хүлээлгези-дир деп дыка хөй кижи санап чоруурун ол демдеглээн. Муң-муң кижилер чаңгыс өг-бүле дег алдынып, тиилелгеге сеткилинден бүзүреп, камгалакчылары аал-чуртунче онча-менди ээп чанып кээрин манап турарлар.
Ачы-дуза чыылдазын удуртуп турар Улусчу фронтунуң регионалдыг штавы шупту кожууннар болгаш хоорай округтары идепкейлиг киржип турарын дыңнаткан. Каа-Хемниң өөредилге эргелелиниң ажылдакчылары дег, чамдыктар акша-хөреңгини шилчиткен болза, өскелер чугула херек чүүлдерни боттары саткаш, дайынчы хөделиишкиннер девискээринче чүък чыыр пунктуларже чедирип турар. Чижээ, чайгы үеде шериг албан-хүлээлгелиглерге генераторлар, бензин-биле ажылдаар хирээлер, мотоциклдер, электромотоциклдер, ужудукчу чок аппараттар, рациялар, чылыг «көөр» хараалдар болгаш эмнер аймаа дыка херек.
Ачы-дуза чүдүрген автомашиналар дүүн Кызылдан үнүпкен. Чүък сөөртүкчүлери 5000 ажыг километр орукту эрткеш, хүлээдир черинге ону чедирер.
