Чеди-Хөл кожууннуң чурттакчылары – Доржу-оол биле Кара-Кыс Кугельчиктер, Владимир биле Байлан Туматтар, Анатолий биле Раиса Ондарлар «алдын кудазын» демдеглеп турар. Олар өг-бүле тудуп, кады эгин кожа чурттанындан бээр 50 чыл четкен.
Тываның хамааты байдалдың актылар бижидилгезиниң органнары бо чылын 80 чыл оюн демдеглеп турар. Чеди-Хөл кожуунда албан чериниң эргелели аңаа тураскаадып, «алдын номну» байырлыг байдалга ажыдып, үстүнде ады кирген өг-бүлелерниң ат-сывын киир бижээнин ном саңы дыңнаткан.
Чеди-Хөл кожууннуң чагырга даргазының социал-политика талазы-биле оралакчызы Нина Монгуш, Тываның хамааты байдалдың актылар бижидилгезиниң Чеди-Хөлде эргелелиниң удуртукчузу Айлана Ондар, К.Д. Оюн аттыг төп ном саңының ажылдакчылары байыр чедирген.
Ном саңының ажылдакчызы Долаана Куулар чалаттырган аалчыларга болгаш өг-бүлелерге «Ыдык. Чаңчыл. Сүзүк» деп делгелгени таныштырган. Ында чылдың чаа номнарны, өг-бүлениң езу-чаңчылдарының, кижизидилгезиниң, үнелиг чүүлдериниң дугайында номнарны, «Элээр куда – аас-кежиктиг өг-бүленин быжыг үндезини» деп сценарийлер чыындыны, «Тыва өг-бүле педагогиказы» дээш оон-даа өске номнарны делгээн.
