Тываның шииткекчилер ниитилежилгези «Сактыышкынның сады» экологтуг-ада-чуртчу акцияга каттышканын шүүгү чери дыңнаткан.
ТР-ниң Дээди, Арбитраж, Суд департамент эргелелиниң, районнар судтарының төлээлери чеди дугаар чыл эртип турар «Сактыышкынның сады» экологтуг-ада-чуртчу акцияга каттышкан. Улуг Тиилелгеге тураскааткан хемчег Кызылдың арга-арыг ажыл-агыйының 58-ки кварталынга болуп эрткен.
Шүүгү ажылдакчылары херекселдер-биле чепсегленгеш, арга-арыг ажылдакчыларының удуртулгазы-биле 10 гектар шөлге хадың өзүмнерин тарып олурткан.
Акцияның кол сорулгазы – Ада-чурттуң Улуг дайынында мөчээн кижи бүрүзүнге сактыышкын кылдыр, регионнарның экологиязын экижидери-биле чыл санында-ла 27 сая ыяштарны тарып олуртуру.
2026 чылда акция бистиң үениң маадырларынга – чурттуң бот-догуннаашкынын бөгүн камгалап турар тускай шериг операциязының киржикчилеринге база тураскааттынган.
Төрээн чуртунуң хосталгазы дээш амы-тынын берген солдаттарның маадырлыг чоруунуң дугайында төөгүлүг сактыышкынны кадагалап арттырары чугула.
Чаап турар хар шаптык болбаан. ТР-ниң Арга-арыг ажыл-агыйы болгаш бойдус ажыглал яамызының төлээлериниң тайылбырлап турары-биле алырга, ындыг агаар-бойдустуг байдалдарда хөрзүн шыгын хевээр арттырар, ол дээрге аныяк хадыларның чедиишкинниг дазылданып, оон-даа ыңай өзеринге таарымчалыг хүрээлел болур.
Арга-арыг даамалының тускай мергежилдиглериниң суд системазының ажылдакчыларынга дамчыткан арга-дуржулгазы, оларга өзүмнер олуртурунуң шын техниказын шиңгээдип алыр арганы берген.
